Ghulam Murtaza Rahi
mazi! tujh se ”hal” mira sharminda hai
mujh se achchha aaj mira karinda hai
kaisa insan taras raha hai jiine ko
kaise sahil par ik machhli zinda hai
us ke pichhe us se baḌh kar ik insan
aage aage ik ḳhun-ḳhvar darinda hai
jaise koi kaaT raha hai jaal mira
jaise uḌne vaala koi parinda hai
nau-e-bashar ka vahshi-pan jab yaad karo
ye mat bhulo jangal ka bashinda hai
bujhte bujhte de jaata hai koi shah
ḳhakistar se chingari sharminda hai
tumhen agar asar dikha.i dete hon
dekho kya hone vaala a.inda hai
Leave a Reply