ik shaḳhs raat band-e-qaba kholta raha
shab ki siyahiyon men shafaq gholta raha
tanha.iyon men aati rahi jab bhi us ki yaad
saaya sa ik qarib mire Dolta raha
husn-e-bahar ḳhuub magar dida-e-bahar
moti chaman ki ḳhaak pe kyuun rolta raha
us ne sukut ko bhi takallum samajh liya
kuchh is ada-e-ḳhas se dil bolta raha
hijran ki raat mashghala-e-dil se puchhiye
us zulf-e-ḳham-ba-ḳham ki girah kholta raha
ham kushtagan-e-ḳhvab giran-gosh hi rahe
suraj saron pe vaqt-e-sahar bolta raha
is rah-e-jazb se bhi guzarna paḌa ‘zahir’
jis raah men ḳhirad ka qadam Dolta raha
Leave a Reply