dil-ruba pahlu se ab uTh kar juda hone ko hai
kya ghazab hai kya qayamat hai ye kya hone ko hai
dushmani-e-ḳhalq meri rahnuma hone ko hai
ab mira dast-e-talab dast-e-dua hone ko hai
tu ne chaha tha bura mera bhala hone ko hai
ab-e-ḳhanjar halq men ab-e-baqa hone ko hai
aaj to ji bhar ke pi lene de ai saaqi mujhe
jaan hi jaati rahegi aur kya hone ko hai
ai dil-e-pur-arzu kar de sar-e-taslim ḳham
dekh kin hathon se ḳhun-e-mudda.a hone ko hai
shoḳh-raftari ka apni dekh to muḌ kar asar
saath saath uTh kar ravan har naqsh-e-pa hone ko hai
Leave a Reply