Zafar Iqbal
kabhi avval nazar aana kabhi aḳhir hona
aur vaqfon se mira gha.eb o hazir hona
main kisi aur zamane ke liye huun shayad
is zamane men hai mushkil mira zahir hona
main na hone pe hi ḳhush tha magar aise hua phir
mujh ko na-char paḌa aap ki ḳhatir hona
duur ho ja.un bhi is bagh-e-badan se lekin
kahin mumkin hi nahin aise manazir hona
vaqa.i tum ko dikha.i hi nahin deta huun
ya zarurat hai tumhari mira munkir hona
rasta aap banana hi koi sahl nahin
phir usi raste ka aap musafir hona
vo maqamat-e-muqaddas vo tire gumbad o qaus
aur mira aise nishanat ka zaa.er hona
badalon aur havaon men uḌa phirta main
kaash hota miri taqdir men taa.ir hona
kaam nikla hai kuchh utna hi ye pechida ‘zafar’
jitna asan nazar aaya mujhe sha.er hona
Leave a Reply