Meena Naqvi
bulandiyon ka tha jo musafir vo pastiyon se guzar raha hai
tamam din ka sulagta suraj samundaron men utar raha hai
tumhari yadon ke phuul aise sahar ko avaz de rahe hain
ki jaise ThanDi hava ka jhonka miri gali se guzar raha hai
alag hain nazren alag nazare ajab hain raz-o-niyaz saare
kisi ke jazbe chamak rahe hain kisi ka ehsas mar raha hai
ajiib josh-e-junun hai us ka ajiib tarz-e-vafa hai mera
main lamha lamha simaT rahi huun vo reza reza bikhar raha hai
nazar men rangin shamiyane mohabbaton ke na.e fasane
ye kaun hai dil ke vasvason men jo mujh ko bechain kar raha hai
tamam alfaz miT chuke hain bas ek saf.ha abhi hai baaqi
use musalsal main paḌh rahi huun jo naqsh dil par ubhar raha hai
vo mere ashkon ke aa.ine men saja hai ‘mina’ kuchh is tarah se
ki jaise shabnam ke qatre qatre men koi suraj sanvar raha hai
Leave a Reply