gulon ko sho.ala mizaji sikha.i jaati hai
chaman ki aag chaman men laga.i jaati hai
junun-e-firqa-parasti are ma.az-allah
har ik qadam pe qayamat uTha.i jaati hai
vo aag jis ne mire gulistan ko phunk diya
nigah-e-shaiḳh-o-barahman men paa.i jaati hai
hamin pe ḳhatm nahin kufr-e-ishq ai naseh
buton ke saath ḳhuda ki ḳhuda.i jaati hai
nahin ye gham ki rasa nala-e-hazin na hue
falak pe aaj miri na-rasa.i jaati hai
ab un ke qaul-o-qasam par nahin hai dil ko yaqin
sitamgaron se kahin bevafa.i jaati hai
in ansuon ko na kar ra.egan are nadan
kahin ye daulat-e-gham yuun luTa.i jaati hai
mafar shamatat-e-ham-saya se ‘jamal’ nahin
ye barq girti nahin hai gira.i jaati hai
Leave a Reply