Bano Tahira Sayeed
ja rahi hai bahar phulon ki
hai qaba taar taar phulon ki
sinchiye pahle ḳhun-e-dil se chaman
dekhiye phir bahar phulon ki
un ke honTon pe muskurati hai
muskurahaT hazar phulon ki
kis qadar talḳh ye haqiqat hai
ham-nashini-e-ḳhar phulon ki
jis ko kahte hain ham bahar-o-ḳhizan
vo to hai jiit haar phulon ki
sach bata kyon ḳhamosh hai bulbul
ai saba raz-dar phulon ki
hai ḳhizan men bhi jaise avara
nik.hat-e-be-qarar phulun ki
kya qafas men bhi gul khila.egi
yaad yuun baar baar phulon ki
‘tahira’ aaj tere sheron men
hai mahak be-shumar phulon ki
Leave a Reply