muntazir dasht-e-dil-o-jan hai ki aahu aa.e
saare manzar hi badal jaa.en agar tu aa.e
niind aa.e to achanak tiri aahaT sun luun
jaag uTThun to badan se tiri ḳhushbu aa.e
be-hunar haath chamakne laga suraj ki tarah
aaj ham kis se mile aaj kise chhu aa.e
saut hi saut hai tasvir hi tasvir hai tu
yaad teri ka.i baten ka.i pahlu aa.e
ham tujhe dekhte hi naqsh-ba-divar hue
ab vahi tujh se milega jise jaadu aa.e
apne hi aks ko paani men kahan tak dekhun
hijr ki shaam hai koi to lab-e-ju aa.e
kisi janib nazar aata nahin badal koi
aur jab sail-e-bala aa.e to har-su aa.e
chahta huun ki ho parvaz sitaron se buland
aur mire hisse men TuuTe hue baazu aa.e
dard men Duubi hui raakh men nahla.i hui
raat yuun aa.i hai jaise koi sadhu aa.e
rasta rok saki hain na fasilen na hisar
phuul jangal men khile shahr men ḳhushbu aa.e
asmanon pe na taare hain na badal hai na chand
ab to mumkin hai kahin se koi jugnu aa.e
vaqt-e-ruḳhsat mire hamrah koi kab aaya
aur agar lauT ke aa.e bhi to aansu aa.e
rog bhi tu ne lagaya hai anokha ‘shahzad’
ab kahan se tire is dard ka daaru aa.e
Leave a Reply