na chehra hi badalta hai na vo tevar badalta hai
vo zalim sirf apne haath ka patthar badalta hai
kai tabdiliyan hoti hain insanon ki basti men
parinda koi dekha hai jo apna ghar badalta hai
jo ham ne apni ankhen phenk di hain us ke qadmon pe
so apni ankhen har ik gaam par dilbar badalta hai
chamak uthte hain aansu meri palkon ke kinaron par
phir is ke baad achanak khvab ka manzar badalta hai
main jab bhi phuul us ki yaad ke gulshan se chunti huun
to ‘bina’ karb mera rang ka paikar badalta hai
Leave a Reply