Ali Qaisar
ḳhat jala.e tiri tasvir jala di main ne
aaj cigarette tiri yadon ki bujha di main ne
uḌ gaya hai meri ankhon ka parinda kab ka
vo jo sarsabz thi ik shaḳh gira di main ne
jo mujhe jaan se pyari thi bhari duniya men
us hasin laḌki ki ab yaad bhula di main ne
raat bhar jagte rahne ki mujhe aadat hai
thapki ab siine pe hasrat to sula di main ne
vo chali aa.i thi milne ke liye ḳhalvat men
apne hathon se use chaa.e bana di main ne
main bhi ziddi tha zarurat se ziyada ‘qaisar’
us ko ik baar na pichhe se sada di main ne
Leave a Reply