palkon pe larazte rahe aansu ki tarah ham
ghar men tire mahka kiye ḳhushbu ki tarah ham
suraj ke liye chhoḌa tha us ne hamen phir bhi
raton ko satate rahe jugnu ki tarah ham
aate rahe jaate rahe kashti ke musafir
pairon se lipaTte rahe baalu ki tarah ham
rekha hai khinchi aur na hai siita koi ghar men
is shahr men kyuun phirte hain sadhu ki tarah ham
ghairon se zyada hamen apnon ne sataya
is mulk men zinda rahe urdu ki tarah ham
Leave a Reply