baDe Sabr-O-Tahammul Se Ba-Sad Pas-E-Adab kaTe

Shauq Mahri

baḌe sabr-o-tahammul se ba-sad pas-e-adab kaaTe

juda.i ik qayamat thi magar ye roz-o-shab kaaTe

qayamat hai ki us ne ek jurm-e-be-gunahi ka

mere dast-e-talab toḌe mire pa-e-talab kaaTe

dil-e-dard-ashna milta to shayad tum samajh sakte

ki tum se duur rah kar ham ne kaise roz-o-shab kaaTe

asiran-e-qafas sayyad ke mamnun ehsan hain

kabhi minqar si Daali kabhi par be-sabab kaaTe

unhen ehsas hi hota to phir ham ko gila kya tha

ki ham ne bar-ha ghabra ke kyuun apne hi lab kaaTe

tamanna hai ki umr-e-‘shauq’ guzre tere qadmon men

tiri zulfon ke saa.e men ye apne roz-o-shab kaaTe