ankhon men bas gaya koi banhon se duur hai
chaha hai chand ko yahi apna qusur hai
dozaḳh men ji raha huun isi ek aas pe
jannat ko koi rasta jaata zarur hai
main laḌkhaḌa raha huun sadaqat ki raah pe
is ruuh pe abhi bhi badan ka surur hai
ye raushni ke daagh ujale to hain nahin
qasir sa asman ke sitaron ka nuur hai
ab kya bata.en tum ko sifat dil ke daagh ki
ham muflison ke paas koi koh-e-nur hai
bhagvan ban gaya hai mira yaar aaj kal
rahta hai saath phir bhi lage duur duur hai
kyuun ishq ki karah gadagar ki aah ho
kya husn ka ghurur ḳhuda.i ka nuur hai
Leave a Reply