bahr-e-alam men dil Duub gaya aaj ki shab
ek mahshar sa hai siine men bapa aaj ki shab
hai musallat mire ehsas ki nannhi lau par
tang hoti hui zulmat ki rida aaj ki shab
yaas vo chha.i ki yuun hota hai mahsus mujhe
saḳht na-ḳhush hai ḳhuda.i se ḳhuda aaj ki shab
haa.e mayus nigahon ki ye taḳhliq ki hai
jis taraf dekhiye ik dam-e-bala aaj ki shab
naz-parvarda-e-aghosh-e-baharan jo the
unhi armanon pe kya vaqt paḌa aaj ki shab
dil ki basta hua ik shahr tha armanon ka
be-tarah yurish-e-hijran se luTa aaj ki shab
ai gham-e-hijr-e-dil-aram ke maare ‘qazi’
vahshat-amoz hai kyon ghar ki faza aaj ki shab
Leave a Reply