Maal-E-Naghma-O-Matam faroKHt Hota Hai

ma.al-e-naghma-o-matam faroḳht hota hai

ḳhushi ke saath yahan gham faroḳht hota hai

vo jis ko aaj bhi kuchh log husn kahte hain

ba-sad-nigarish-e-paiham faroḳht hota hai

fareb-ḳhurda tabassum ḳharidne ke liye

vaqar-e-dida-e-pur-nam faroḳht hota hai

baḌe hasin ghanere siyah pardon men

jamal-e-ismat-e-maryam faroḳht hota hai

bahar-e-vadi-e-gang-o-jaman ke saath yahan

vaqar-e-kausar-o-zamzam faroḳht hota hai

vo jism-e-marmarin nazren bhi jis ko chhu na sakin

bara.e-raunaq-e-alam faroḳht hota hai

tilism-ḳhana-e-sad-rang-o-bu men ai ‘saghar’

fareb-e-shola-o-shabnam faroḳht hota hai