Kaif Bhopali
ham un ko chhin kar laa.e hain kitne davedaron se
shafaq se chandni-raton se phulon se sitaron se
hamare zaḳhm-e-dil dagh-e-jigar kuchh milte-julte hain
gulon se gul-ruḳhon se mahvashon se mah-paron se
zamane men kabhi bhi qismaten badla nahin kartin
umidon se bharoson se dilason se saharon se
sune koi to ab bhi raushni avaz deti hai
guphaon se pahaḌon se bayabanon se gharon se
barabar ek pyasi ruuh ki avaz aati hai
kuon se pan-ghaTon se naddiyon se absharon se
kabhi patthar ke dil ai ‘kaif’ pighle hain na pighlenge
munajaton se fariyadon se chiḳhon se pukaron se
Leave a Reply