Rajinder Manchanda Bani
sarsabz mausamon ka nasha bhi mire liye
talvar ki tarah hai hava bhi mire liye
mere liye hain manzar-o-ma.ani hazar rang
lafzon ke darmiyan hai ḳhala bhi mire liye
shamil huun qafile men magar sar men dhund hai
shayad hai koi raah juda bhi mire liye
main ḳhush hua ki muzhda safar ka mujhe mila
phaila hua hai dasht-e-saza bhi mire liye
dekhun main aa.ina to dhuan phail phail jaa.e
bolun to ajnabi hai sada bhi mire liye
mere liye tamam aziyyat tamam qahr
aur phuul se labon pe dua bhi mire liye
‘bani’ ajab tarah se khuli ḳhush-muqaddari
barg-e-shafaq bhi barg-e-hina bhi mire liye
Leave a Reply