Mari Wafa Ne Khilae the Jo Gulab Sare Jhulas Gae Hain

Wasi Shah

mari vafa ne khila.e the jo gulab saare jhulas ga.e hain

tumhari ankhon men jis qadar the vo ḳhvab saare jhulas ga.e hain

mari zamin ko kisi na.e hadse ka hai intizar shayad

gunah phalne lage hain ajr o savab saare jhulas ga.e hain

jo tum ga.e to miri nazar pe haqiqaton ke azaab utre

ye sochta huun ki kya karunga sarab saare jhulas ga.e hain

ye mo.ajiza sirf ek shab ki masafaton ke sabab hua hai

tumhare aur mere darmiyan ke hijab saare jhulas ga.e hain

use batana ki us ki yadon ke saare safhe jala chuka huun

kitab-e-dil men raqam the jitne vo baab saare jhulas ga.e hain

nazar uTha.un main jis taraf bhi muhib saa.e hain zulmaton ke

ye kya ki mere nasib ke mahtab saare jhulas ga.e hain

tumhari nazron ki ye tapish hai ki mere lafzon pe aable hain

saval saare jhulas ga.e hain javab saare jhulas ga.e hain

ye aag ḳhamoshiyon ki kaisi tumhari ankhon men tairti hai

tumhare honTon pe darj the jo nisab saare jhulas ga.e hain