munawwar-rana

Kabhi Khushi Se Khushi Ki Taraf Nahin Dekha

kabhi khushi se khushi ki taraf nahin dekha

tumhare baad kisi ki taraf nahin dekha

ye soch kar ki tira intizar lazim hai

tamam-umr ghadi ki taraf nahin dekha

yahan to jo bhi hai ab-e-ravan ka ashiq hai

kisi ne khushk nadi ki taraf nahin dekha

vo jis ke vaste pardes ja raha huun main

bichhadte vaqt usi ki taraf nahin dekha

na rok le hamen rota hua koi chehra

chale to mud ke gali ki taraf nahin dekha

bichhadte vaqt bahut mutmain the ham donon

kisi ne mud ke kisi ki taraf nahin dekha

ravish buzurgon ki shamil hai meri ghutti men

zaruratan bhi sakhi ki taraf nahin dekha

More Poems

Leave a Comment