TuTe Hain Aainon Ki Tarah Bar Bar Hum

TuuTe haiñ ā.inoñ kī tarah baar baar ham

ḳhud par hue haiñ jab bhī kabhī āshkār ham

hote haiñ terī yaad meñ jab be-qarār ham

rote haiñ pahroñ baiTh ke be-iḳhtiyār ham

terī hañsī kā qarz chukāne ke vāste

chhup chhup ke rote rahte haiñ zār-o-qatār ham

dil bhar gayā hai karb-e-musalsal se ai ḳhudā

ab DhūñDte haiñ har ghaḌī rāh-e-farār ham

murjhā ga.e haiñ shāḳh-e-tamannā ke gul sabhī

ab kyā manā.eñ ‘mīnā’ ye jashn-e-bahār ham

Leave a Comment