Taruna Mishra
ishq ki rasm nibhana thi nibha li main ne
dard ki basti basana thi basa li main ne
vo zarur aa.ega ik aas laga li main ne
ghar ki har chiiz qarine se saja li main ne
aaj phir chaa.e banate hue vo yaad aaya
aaj phir chaa.e men patti nahin Daali main ne
aag dahki to nikalna paḌa kamre se magar
us ki tasvir kisi tarah bacha li main ne
naam us ka hi liya karti hai vo sham-o-sahar
ek maina jo baḌe pyaar se paali main ne
vo to mahfil men hi elan-e-vafa kar deta
baat mat puchhiye phir kaise sambhali main ne
ghar ki buniyad ke patthar bhi saḌak par hote
vo to achchha hua divar bacha li main ne
Leave a Reply