dil-E-Viran Bhi Tha Maskan Kisi Ka

Poet

dil-e-viran bhi tha maskan kisi ka

usi men nuur tha raushan kisi ka

gadhi hai aarzu zinda hai hasrat

kisi ka ghar hai dil madfan kisi ka

bapa hai shor-e-mahshar qatl-gah men

kisi ka haath hai daman kisi ka

do-alam ko tah-o-bala na kar de

badalna naaz hai chitvan kisi ka

gulistan men zara ja kar to dekho

kisi ki khandgi shevan kisi ka

bharosa charkh par ai dil na karna

hua kab dost ye pur-fan kisi ka

charagh-e-ishq hai aansu se raushan

kisi ka khun-e-dil roghan kisi ka

tamanna shauq se nigaran hai is men

kisi ka zakhm-e-dil rauzan kisi ka

‘jamila’ dasht men kahti thi ro kar

ilahi dil na ho dushman kisi ka