Poet
dard uTh uTh ke ye kahta hai rag-e-jan ke qarib
abhi zindan men huun lekin dar-e-zindan ke qarib
aag jangal bhari nindon men lagane vaale
tum bhi aana na mire ḳhvab-e-pareshan ke qarib
ḳhushk ankhon men tire ḳhvab basa.un kaise
koi chashma bhi zaruri hai bayaban ke qarib
sardiyon ki ye ḳhunuk dhuup bhi pighlane lagi
jaise baiTha huun usi sho.ala-ba-daman ke qarib
aankh khulte hi na vo tha na charaghan na ḳhumar
raat guzri thi kisi chand se mehman ke qarib
Duub jaata huun main har sub.h ufuq men dil ke
shahr-e-janan se pare shahr-e-ḳhamoshan ke qarib
Leave a Reply