Raushan Jamal-E-Yar Se Hai Anjuman Tamam

raushan jamal-e-yar se hai anjuman tamam

dahka hua hai atish-e-gul se chaman tamam

hairat ghurur-e-husn se shokhi se iztirab

dil ne bhi tere siikh liye hain chalan tamam

allah-ri jism-e-yar ki khubi ki khud-ba-khud

ranginiyon men Duub gaya pairahan tamam

dil khuun ho chuka hai jigar ho chuka hai khaak

baaqi huun main mujhe bhi kar ai tegh-zan tamam

dekho to chashm-e-yar ki jadu-nigahiyan

behosh ik nazar men hui anjuman tamam

hai naz-e-husn se jo farozan jabin-e-yar

labrez ab-e-nur hai chah-e-zaqan tamam

nash-o-numa-e-sabza-o-gul se bahar men

shadabiyon ne gher liya hai chaman tamam

us naznin ne jab se kiya hai vahan qayam

gulzar ban gai hai zamin-e-dakan tamam

achchha hai ahl-e-jaur kiye jaaen sakhtiyan

phailegi yuun hi shorish-e-hubb-e-vatan tamam

samjhe hain ahl-e-sharq ko shayad qarib-e-marg

maghrib ke yuun hain jama ye zaagh o zaghan tamam

shirini-e-nasim hai soz-o-gudaz-e-‘mir’

‘hasrat’ tire sukhan pe hai lutf-e-sukhan tamam

Leave a Comment