maara hamen is daur ki asan-talbi ne
kuchh aur the is daur men jiine ke qarine
har jaam lahu-rang tha dekha ye sabhi ne
kyuun shisha-e-dil chuur tha puchha na kisi ne
ab halqa-e-girdab hi aghosh-e-sukun hai
sahil se bahut duur duboe hain safine
har lamha-e-khamosh tha ik daur-e-pur-ashob
guzre hain isi taur se saal aur mahine
maazi ke mazaron ki taraf soch ke badhna
ho jaoge mayus na kho do ye dafine
har bazm-e-sukhan jhute naginon ki numaish
sartaj-e-sukhan the jo kahan hain vo nagine
Leave a Reply