aajis par dil rota hai vo bhi hans kar karna paḌta hai
apne ghar ki raunaq ko ḳhud be-ghar karna paḌta hai
achchhe achchhe dab jaate hain rasm-e-zamana ke aage
dekh ke chup rahte hain dil ko patthar karna paḌta hai
aane vaale din ki fikren ḳhvabon ko Das leti hain
niind se jalti ankhon ko be-manzar karna paḌta hai
chahne aur chahe jaane ki ḳhvahish jurm nahin lekin
rusva.i ko apne sar ki chadar karna paḌta hai
aise moḌ pe aa jaati hai baḌhte baḌhte baat kabhi
phuul se lahje ko majburan ḳhanjar karna paḌta hai
raat para.e des men kaaTi to ye bhi ma.alum hua
haath ko takiya aur zamin ko bistar karna paḌta hai
ji kahta hai rad kar duun main aise ḳhvabon ko ‘ma.asum’
jin ki ta.abiron par matam aksar karna paḌta hai
Leave a Reply