Muzaffar Ahmad Muzaffar
sharik-e-rasm-e-girya hain samundar-ashna ankhen
jahan-e-arzu men kar na den mahshar bapa ankhen
ye patthar ki na ho jaa.en kahin aqlim-e-hasti men
rakhe mahfuz ashob-e-tamanna se ḳhuda ankhen
tumhare va.ada-e-shab ka yaqin aata nahin un ko
rahin-e-fitna-e-gham hain sukun na-ashna ankhen
hisar-e-dasht-e-vahshat men bagulon ke isharon par
hatheli par liye phirti hai muddat se hava ankhen
fasil-e-shahr-e-tariki se jaane kab riha.i ho
asir-e-qariya-e-shab hain miri simab-pa ankhen
tumhari shan-e-yakta.i hai aalam dil-farebi ka
vagarna dekhti hain yuun pas-e-manzar men kya ankhen
harim-e-naz men tera na gar jalva dikha.i de
to behtar hai rah-e-ulfat men ho jaa.en fana ankhen
hui muddat nigahon se chhua tha marmarin chehra
tilism-e-ḳhvab se ab tak na ho pa.in riha ankhen
‘muzaffar’ zindagi men farz to ik baar tha lekin
tavaf-e-ka.aba-e-dil kar chuki hain barha ankhen
Leave a Reply