Junaid Akhtar
saare to nahin jaan bachane men lage hain
kuchh ghaav hamen zaḳhm lagane men lage hain
hai sab ko ḳhabar shaah ke chehre pe hai kalak
a.ine magar saare chhupane men lage hain
bech aa.e ise is ke nigahban kabhi ka
ham log magar ghar ko sajane men lage hain
baiTha hi nahin jaata parindon men bhi ab to
be-par ki yahan ye bhi uḌane men lage hain
marne pe khuli hai tire darvesh ki qimat
patthar bhi sirhane ke ḳhazane men lage hain
sahra men chala aaya huun kuchh pyaas bujha luun
dariyaon pe sab piine pilane men lage hain
aa ja.egi chakkar men hamare vo kisi din
ham gardish-e-dauran ko ghumane men lage hain
lagta hi nahin daur-e-mohabbat bhi kabhi tha
ab log yahan sirf kamane men lage hain
us ne bhi to hai vaqt ki gardish ko sanvara
‘aḳhtar’ se ka.i chand zamane men lage hain
Leave a Reply