kahan ka sabr sau sau baar divanon ke dil TuuTe
shikast-e-dil ke ḳhadshe hi se na-danon ke dil TuuTe
gire hain TuuT kar kuchh aa.ine shaḳhon ki palkon se
ye kis ki aah thi kyuun shabnamistanon ke dil TuuTe
is ara.ish se to kuchh aur ubhri un ki virani
babulon par bahar aa.i to viranon ke dil TuuTe
vo mahrumi ka josh-e-ḳhvab-parvar ab kahan baaqi
bar aa.iin itni ummiden ki armanon ke dil TuuTe
unhen apne gudaz-e-dil se andaza tha auron ka
jab insanon ke dil dekhe to insanon ke dil TuuTe
qafas se husn-e-gul ke qadr-dan ab tak nahin palTe
shagufon ke tabassum se gulistanon ke dil TuuTe
‘ziya’ apni tabahi par unhen bhi naaz the kya kya
hamen dekha to sahraon bayabanon ke dil TuuTe
Leave a Reply