zara si baat pe dil se bigaḌ aaya huun
bana banaya hua ghar ujaaḌ aaya huun
vo intiqam ki atish thi mere siine men
mila na koi to ḳhud ko pachhaḌ aaya huun
main is jahan ki qismat badalne nikla tha
aur apne haath ka likkha hi phaaḌ aaya huun
ab apne dusre phere ke intizar men huun
jahan jahan mire dushman hain taaḌ aaya huun
main us gali men gaya aur dil o nigah samet
‘jamal’ jeb men jo kuchh tha jhaaḌ aaya huun
Leave a Reply