bhiga hua hai anchal ankhon men bhi nami hai
phaila hua hai kajal ankhon men bhi nami hai
barsega aaj khul kar bechain-o-muztarib huun
chhaya hai gham ka badal ankhon men bhi nami hai
kaisi ajiib halat taari hui hai dil par
huun muntazir musalsal ankhon men bhi nami hai
muddat ke baad aaya duniya-e-dil men koi
sahra hua hai jal-thal ankhon men bhi nami hai
ye ḳhud-supurdagi ka hai ik ajiib aalam
ḳhvabon ka jaise jangal ankhon men bhi nami hai
mahsus ho raha hai ik jaal men huun kab se
ye ishq hai ki daldal ankhon men bhi nami hai
ik harf-e-haq ke badle chaḌhte hain kitne suuli
shahr-e-vafa hai maqtal ankhon men bhi nami hai
ik din suḳhan ki malika ban jaogi ‘sabila’
phir aaj kyuun ho be-kal ankhon men bhi nami hai
Leave a Reply