milega dard to darman ki aarzu hogi
tamam umr gharaz sirf justuju hogi
phir aaj dil se muḳhatab hai shab ka sannaTa
phir aaj sub.h talak un ki guftugu hogi
junun ka shaghl salamat rafu ki fikr na kar
kise ḳhabar hai ki kab fursat-e-rafu hogi
abhi jalenge yahan aur be-ruḳhi ke charagh
is anjuman men vafa aur surḳh-ru hogi
chalegi baat jahan teri kaj-ada.i ki
miri vafa bhi to mauzu-e-guftugu hogi
bachenge barq-e-havadis se ashiyan kab tak
ki tez-tar abhi tahrik-e-rang-o-bu hogi
milenge raah men aise aise bhi ham-safar ‘taban’
qadam qadam jinhen manzil ki justuju hogi
Leave a Reply