raat ki ninden to pahle hi uḌa kar le gaya
rah ga.i thi aarzu so vo bhi aa kar le gaya
din nikalte hi vo ḳhvabon ke jazire kya hue
sub.h ka suraj miri ankhen chura kar le gaya
duur se dekho to ye dariya hai paani ki lakir
mauj men aaya to jangal bhi baha kar le gaya
us ne to in motiyon par ḳhaak bhi Daali nahin
aankh ki thali men dil aansu saja kar le gaya
ghaur se dekha to dil ki ḳhaak tak baaqi na thi
mujh ko da.ava tha ki main sab kuchh bacha kar le gaya
Leave a Reply