pichhle kisi safar ka sitara na DhunD le
phir se kahin vo saath hamara na DhunD le
jis ko ki DhunDhti hain samundar ki vus.aten
dekho kahin vo shaḳhs kinara na DhunD le
manzil hai us ke naam bas itna rahe ḳhayal
raste men naqsh-e-pa vo hamara na DhunD le
maani thi ek baar jo dil ne ḳhirad ki baat
vaisa ye e’tidal dobara na DhunD le
hota nahin kisi se haq is ka ada ‘farogh’
kyuun zindagi ajal ka sahara na DhunD le
Leave a Reply