Vikas Sharma Raaz
zara lau charagh ki kam karo mira dukh hai phir se utaar par
jise sun ke ashk chhalak paḌen vahi dhun bajao sitar par
zara hairaton se nikal to luun zara hosh aa.e to kuchh kahun
abhi kuchh na puchh ki kya hua mira dhyan abhi hai ghubar par
kahin harf harf gulab hai kahin ḳhushbuon se ḳhitab hai
main ḳhizan-nasib sahi magar mira tabsira hai bahar par
mire dost tujh ko hai kya pata tujhe de rahe hain jo mashvara
yahi log jashn manaenge miri jiit par tiri haar par
jahan har singar fuzul hon jahan ugte sirf babul hon
jahan zard rang ho ghaas ka vahan kyuun na shak ho bahar par
Leave a Reply