saaf zahir hai nigahon se ki ham marte hain
munh se kahte hue ye baat magar darte hain
ek tasvir-e-mohabbat hai javani goya
jis men rangon ke evaz ḳhun-e-jigar bharte hain
ishrat-e-rafta ne ja kar na kiya yaad hamen
ishrat-e-rafta ko ham yaad kiya karte hain
asman se kabhi dekhi na gai apni ḳhushi
ab ye halat hai ki ham hanste hue darte hain
sher kahte ho bahut ḳhuub tum ‘aḳhtar’ lekin
achchhe shair ye suna hai ki javan marte hain
Leave a Reply