shajar hajar pe hain gham ki ghataen chhai hui
subuk-khiram havaon ko niind aai hui
ragen zamin ke manazir ki pad chalin dhili
ye khasta-hali ye darmandagi ye sannata
faza-e-nim-shabi bhi hai sansanai hui
dhuan dhuan se manazir hain shabnamistan ke
sayyara raat ki zulfen hain rasmasai hui
ye rang taron bhari raat ke tanaffus ka
ki bu-e-dard men har saans hai basai hui
khunuk udaas fazaon ki ankhon men aansu
tire firaq ki ye tiis hai uthai hui
sukut-e-nim-shabi gahra hota jaata hai
ragen hain sina-e-hasti ki tilmilai hui
hai aaj saz-e-nava-ha-e-khun-chakan ai dost
hayat teri judai ki chot khaai hui
miri in ankhon se ab niind parda karti hai
jo tere panja-e-rangin ki thiin jagai hui
sarishk paale hue tere narm daman ke
nashat tere tabassum se jagmagai hui
latak vo gesuon ki jaise pech-o-tab-e-kamand
lachak bhavon ki vo jaise kaman jhukai hui
sahar ka jaise tabassum damak vo mathe ki
kiran suhag ki bindi ki lahlahai hui
vo ankhdiyon ka fusun ruup ki vo deviyyat
vo siina ruh-e-numu jis men kanmanai hui
vo sej saans ki khushbu ko jis pe niind aae
vo qad gulab ki ik shakh lahlahai hui
vo jhilmilate sitare tire pasine ke
jabin-e-sham-e-javani thi jagmagai hui
ho jaise but-kada aazar ka bol uthne ko
vo koi baat si goya labon tak aai hui
vo dhaj vo dilbari vo kam-rup ankhon ka
sajal adaon men vo ragni rachai hui
ho khvab-gah men shoalon ki karvaten dam-e-subh
vo bhairvin tiri bedariyon ki gaai hui
vo muskurati hui lutf-e-did ki subhen
tiri nazar ki shuaon ki gudgudai hui
lagi jo tere tasavvur ke narm shoalon se
hayat-e-ishq se us aanch ki tipai hui
hanuz vaqt ke kanon men chahchahahat hai
vo chaap tere qadam ki suni-sunai hui
hanuz sina-e-mazi men jagmagahat hai
damakte ruup ki dipavli jalai hui
lahu men duubi umangon ki maut rok zara
harim-e-dil men chali aati hai dhitai hui
rahegi yaad javan-bevgi mohabbat ki
suhag raat ki vo chudiyan badhai hui
ye meri pahli mohabbat na thi magar ai dost
ubhar gai hain vo choten dabi-dabai hui
supurdagi o khulus-e-nihan ke parde men
jo teri narm-nigahi ki thiin bi.thai hui
utha chuka huun main pahle bhi hijr ke sadme
vo saans dukhti hui aankh dabdabai hui
ye hadsa hai ajab tujh ko pa ke kho dena
ye saneha hai ghazab teri yaad aai hui
ajiib dard se koi pukarta hai tujhe
gala rundha hua avaz thar tharrai hui
kahan hai aaj tu ai rang-o-nur ki devi
andheri hai miri duniya luti-lutai hui
pahunch sakegi bhi tujh tak miri nava-e-firaq
jo kaenat ke ashkon men hai nahai hui
Leave a Reply