ruke ruke se qadam ruk ke baar baar chale
qarar de ke tire dar se be-qarar chale
uthae phirte the ehsan jism ka jaan par
chale jahan se to ye pairahan utaar chale
na jaane kaun si mitti vatan ki mitti thi
nazar men dhuul jigar men liye ghubar chale
sahar na aai kai baar niind se jaage
thi raat raat ki ye zindagi guzar chale
mili hai shama se ye rasm-e-ashiqi ham ko
gunah haath pe le kar gunahgar chale
Leave a Reply