Qamat-E-Yar Ko Hum Yaad Kiya Karte Hain

qamat-e-yar ko ham yaad kiya karte hain

sarv ko sadqe men azad kiya karte hain

zulf-e-shab-rang ko ham yaad kiya karte hain

shab-e-tarik men fariyad kiya karte hain

nigah-e-yar ko ham yaad kiya karte hain

dekh kar barq ko fariyad kiya karte hain

kucha-e-yar ko ham yaad kiya karte hain

ja ke gulzar men fariyad kiya karte hain

ghar jo be-yar hai viran to tasavvur men mudam

khana-e-dil ko ham abad kiya karte hain

rashk se naam nahin lete ki sun le na koi

dil hi dil men use ham yaad kiya karte hain

guzre hain kucha-e-kakul se saba ke jhonke

nikhat-e-gul ko jo barbad kiya karte hain

hote hain jaate hi maktab men pari-ru khun-rez

kya ye jalladon ko ustad kiya karte hain

phunk den nala-e-sozan se agar chahen qafas

ham faqat khatir-e-sayyad kiya karte hain

hoti hai afat-e-khat qahr-e-khuda se nazil

ye sanam ham pe jo bedad kiya karte hain

malak-ul-maut agar kahiye unhen to hai baja

qatl be-tegh pari-zad kiya karte hain

tu vo sayyad hai jo vaar ke tujh par lakhon

taer-e-ruh ko azad kiya karte hain

intiqam is ka kahin le na falak Darta huun

jhute vaadon se jo vo shaad kiya karte hain

tera divan hai kya samne un ke ‘nasikh’

jo ki qur.an pe irad kiya karte hain

Leave a Comment