chamak yunhi nahin lafzon men aa.i
kiya hai ḳhun-e-dil ko raushna.i
mire chehre se chipki thi udasi
hansi mayus ho kar lauT aa.i
tamannaon ne ki sahra-navardi
junun ne shahar men hi ḳhaak uḌaa.i
main dil ki baat sunne ka huun aadi
mubarak tum ko patthar ki ḳhuda.i
kitaben ishq ki gum ho ga.i hain
adhuri rah ga.i meri paḌha.i
ujala bhar gaya kamre men mere
tiri tasvir ki hai ru-numa.i
tamazat mera matha chumti hai
main jab karta huun suraj ki bura.i
nahin ḳhvahish parinda shaḳh-e-dil par
to is ke TuuT jaane men bhala.i
ḳharidega ‘musavvir’ kaun tum ko
agar qimat nahin apni baḌha.i
Leave a Reply