savad-e-sham se ta-subh-e-be-kinar gai
tire liye to main har baar haar haar gai
kahan ke khvab ki ankhon se tere lams ke baad
hazar raat gai aur be-shumar gai
main misl-e-mausam-e-gham tere jism o jaan men rahi
ki khud bikhar gai lekin tujhe nikhar gai
kamal-e-kam-nigahi hai ye e’tibar tira
vahi nigah bahut thi jo dil ke paar gai
ajab sa silsila-e-na-rasai saath raha
main saath rah ke bhi aksar use pukar gai
khabar nahin ki ye puchhun to kis se puchhun main
vahan talak main gai huun ki rahguzar gai
Leave a Reply