maut aa.i hai zamane ki to mar jaane do
kam se kam us ki javani to guzar jaane do
jaag uTThenge ham abhi aisi zarurat kya hai
dhuup divar se kuchh aur utar jaane do
muddaten ho ga.iin ik baat mire zehn men hai
sochta huun tumhen batla.un magar jaane do
gardish-e-vaqt ka kitna hai kushada angan
ab to mujh ko isi angan men bikhar jaane do
ḳhush-nasibi se idhar atish-e-gham ḳhuub hai tez
dosto ab miri hasti ko nikhar jaane do
koi manzil nahin rah ja.egi sar hone ko
aadmi ko zara allah se Dar jaane do
toḌ do baḌh ke ye mafruza vafaon ke hisar
dil ki avaz jidhar jaa.e udhar jaane do
vaqt ke haath ka phenka hua patthar huun main
ab to mujh ko kisi shishe men utar jaane do
uljhanen ḳhatm na kyuun hongi zamane ki ‘alim’
un ke uljhe hue gesu to sanvar jaane do
Leave a Reply