chale hi ja.egi kya dard ki kaTari bhala
rahegi saath kahan tak ye ah-o-zari bhala
jahan ḳhulus ki azmat samajh sake na koi
is anjuman men ho kya qadr-e-jan-nisari bhala
sahi na ja.egi ab ham se ye firaq ki aag
akele sulgen kahan tak tire pujari bhala
nafas nafas men jo tahlil ho chuka vo gham
chhupa.e kaise tabassum ki parda-dari bhala
baḌha jo zabt hadon se to ḳhud khulenge honT
rahega bazm pe kab tak sukut taari bhala
chalo yahan se bhi ‘anjum’ ko baiThne degi
kahan sukun se ye dil ki be-qarari bhala
Leave a Reply