ye bata de mujh ko mere dil kise avaz duun
khud masiha hai mira qatil kise avaz duun
jitne saaqi the mire sab nazr-e-tufan ho gae
aur koson duur hai sahil kise avaz duun
le gaya vo saath apne gulshan-e-dil ki bahar
suuni suuni hai miri mahfil kise avaz duun
haal mera khanjar-e-mazi se zakhmi ho gaya
ro raha hai mera mustaqbil kise avaz duun
vo chalata hai ajab andaz se tir-e-nazar
aur men ho jaata huun bismil kise avaz duun
kaun hai mushkil-kusha mera qaba tere siva
jab pade mujh par koi mushkil kise avaz duun
jaan nichhavar kar raha tha mujh pe jo ‘afzal’ kabhi
dushmanon men vo bhi hai shamil kise avaz duun
Leave a Reply