maut ke jhule se bahar aa ga.i
main kisi rishte se bahar aa ga.i
rafta-rafta dard-e-dil ghaTta gaya
laash ḳhud malbe se bahar aa ga.i
maut ke kas kar gale ham kya lage
zindagi ḳhatre se bahar aa ga.i
lab chhupate hi rahe sab se jise
baat vo lahje se bahar aa ga.i
oḌh kar baiThe the ham sanjidgi
par hansi dhoke se bahar aa ga.i
dekhne vaale tamasha ban ga.e
dastan parde se bahar aa ga.i
mere hisse men thi duniya aur main
apne hi hisse se bahar aa ga.i
bas vo mujh ko qaid karne vaala tha
aur main sapne se bahar aa ga.i
Leave a Reply