obaidullah-aleem

Wahshat Usi Se Phir Bhi Wahi Yar Dekhna

vahshat usi se phir bhi vahi yaar dekhna

pagal ko jaise chand ka didar dekhna

is hijrati ko kaam hua hai ki raat din

bas vo charagh aur vo divar dekhna

paanv men ghumti hai zamin asman talak

is tifl-e-shir-khvar ki raftar dekhna

ya-rab koi sitara-e-ummid phir tulu

kya ho gae zamin ke asar dekhna

lagta hai jaise koi vali hai zuhur men

ab shaam ko kahin koi mai-khvar dekhna

is vahshati ka haal ajab hai ki us taraf

jaana bhi aur janib-e-pindar dekhna

dekha tha khvab shaer-e-momin ne is liye

taabir men mila hamen talvar dekhna

jo dil ko hai khabar kahin milti nahin khabar

har subh ik azaab hai akhbar dekhna

main ne suna hai qurb-e-qayamat ka hai nishan

be-qamati pe jubba-o-dastar dekhna

sadiyan guzar rahi hain magar raushni vahi

ye sar hai ya charagh sar-e-dar dekhna

is qafile ne dekh liya karbala ka din

ab rah gaya hai shaam ka bazar dekhna

do chaar ke siva yahan likhta ghazal hai kaun

ye kaun hain ye kis ke taraf-dar dekhna

More Poems

Leave a Comment