ibraton ke har ik bayan men huun
dard ki saari dastan men huun
har qadam gardishen hain tera nasib
main bhi har saans imtihan men huun
ḳhud nishana huun aur shikar bhi ḳhud
tiir huun aur abhi kaman men huun
mera hafiz baḌa muhafiz hai
hazrat-e-ishq ki amaan men huun
vo ḳharaba jo tu ne chhoḌ diya
main abhi tak usi makan men huun
sab farishte hain mere charon taraf
main zamin par ya asman men huun
mera azm-e-safar salamat hai
dhuup men huun ki sa.eban men huun
sarhaden chhu ke lauT aata huun
haq-o-batil ke darmiyan men huun
dushmanon ke had-e-yaqin se duur
doston ke har ik guman men huun
harf-e-haq teri justuju ban kar
main savalon ke har nishan men huun
kal talak tha sarapa zabt-o-sukut
aaj har ek ki zaban men huun
chand ḳhush-nam hafizon ke siva
main saf-e-yad-e-raftagan men huun
Leave a Reply