Sabir Abuhari
mohabbat phuul bhi hai ḳhaar bhi hai
ye virana bhi hai gulzar bhi hai
farozan karke dekhe sham-e-dil ko
patanga paikar-e-anvar bhi hai
kamal-e-agahi par marne vaalo
kamal-e-agahi azar bhi hai
tamasha ban gaya jis ka tahayyur
nazar vo la.eq-e-didar bhi hai
go laakh aram ho kunj-e-qafas men
asiri ruuh ka azar bhi hai
yahan sham-o-sahar bikte hain yusuf
ye duniya misr ka bazar bhi hai
jo dil hai zamin-e-mehr-o-mohabbat
vahi dil bani-e-paikar bhi hai
vo ‘sabir’ naam hai rindon men jis ka
suna hai mahram-e-asrar bhi hai
Leave a Reply