us sang-e-astan pe jabin-e-niyaz hai
vo apni ja-namaz hai aur ye namaz hai
na-saz hai jo ham se usi se ye saaz hai
kya ḳhuub dil hai vaah hamen jis pe naaz hai
pahuncha hai shab kamand laga kar vahan raqib
sach hai haram-zade ki rassi daraz hai
us but pe gar ḳhuda bhi ho ashiq to aa.e rashk
har-chand janta huun ki vo pak-baz hai
maddah-e-ḳhal-e-ru-e-butan huun mujhe ḳhuda
baḳhshe to kya ajab ki vo nukta-navaz hai
Darta huun ḳhanjar us ka na bah jaa.e ho ke aab
mere gale men nala-e-ahan-gudaz hai
darvaza mai-kade ka na kar band mohtasib
zalim ḳhuda se Dar ki dar-e-tauba baaz hai
ḳhana-ḳharabiyan dil-e-bimar-e-gham ki dekh
vo hi dava ḳharab hai jo ḳhana-saz hai
shabnam ki ja-e-gul se Tapakti hain shoḳhiyan
gulshan men kis ki ḳhak-e-shahidan-e-naz hai
aah o fughan na kar jo khule ‘zauq’ dil ka haal
har naala ik kalid-e-dar-e-ganj-e-raz hai
Leave a Reply