Fareed Javed
ghubar dil pe bahut aa gaya hai dho len aaj
khuli faza men kahin duur ja ke ro len aaj
dayar-e-ghair men ab duur tak hai tanha.i
ye ajnabi dar-o-divar kuchh to bolen aaj
tamam-umr ki bedariyan bhi sah lenge
mili hai chhanv to bas ek niind so len aaj
tarab ka rang mohabbat ki lau nahin deta
tarab ke rang men kuchh dard bhi samo len aaj
kise ḳhabar hai ki kal zindagi kahan le jaa.e
nigah-e-yar tire saath hi na ho len aaj
Leave a Reply